На традыцыйным літаратурна-музычным свяце “Кушлянскі фэст”, што ладзіўся ў музеі-сядзібе Францішка Багушэвіча, сабраліся аматары беларускага слова, танца і музыкі.
Літаратурны квіз, майстар-класы, інтэрактыўная пляцоўка “Пуцявінамі роднага слова”, выступленне народнага тэатра лялек “Батлейка”, экскурсіі па музеі-сядзібе “Кушляны”… - удзельнікаў свята чакала насычаная праграма.
Гасцей фэсту віталі дырэктар Дзяржаўнага музея гісторыі беларускай літаратуры Сяргей Усік і начальнік аддзела культуры райвыканкама Таццяна Ражэва. На сцэну выйшлі літаратары Віктар Шніп і Іна Фралова.
Сёлета Дзяржаўны музей гісторыі беларускай літаратуры сумесна са Смаргонскім райвыканкамам і Саюзам пісьменнікаў Беларусі распачалі новую традыцыю – арганізавалі творчы конкурс “Усім будзе чутна: ад краю да краю”. Падчас імпрэзы ў Кушлянах былі падведзены яго вынікі. Узнагароды ўручылі пісьменнік Віктар Шніп і дырэктар музея гісторыі беларускай літаратуры Сяргей Усік.
У межах свята быў арганізаваны першы фестваль інструментальнай народнай музыкі “Іграю, як знаю, скачу, як хачу”. Удзел у ім прынялі пяць калетываў: гурт “Анягож” з Мінска, узорны ансамбль народнай музыкі “Гулянок” і народны ансамбль народнай музыкі “Явар” са Смаргоні, узорны фальклорны калектыў “Нальшчаначка” з Жодзішак і гурт “Кушлянская капэла”.
Этна-праект Патрыцыі Свіцінай з фальклорнай праграмай традыцыйных беларускіх песень, танцаў і гульняў стаў прыгожым завяржэнне “Кушлянскага фэсту”.
(Больш падрабязна пра свята чытайце ў папяровай версіі газеты “Светлы шлях”).
