Вучні сярэдняй школы № 7 г. Смаргоні наведалі выставу “Смаргонь кірмашовая”, арганізаваную Смаргонскім гісторыка-краязнаўчым музеем. Выстава дазволіла зазірнуць у мінулае нашай маленькай радзімы.
Падчас выставы мы ўбачылі разнастайны гліняны посуд, пазнаёміліся са спосабамі яго вырабу; прылады працы, якімі карысталіся нашы продкі, каб мяць лён, прасаваць адзенне (не толькі жалезнымі прасамі на вуглях), шыць абутак са скуры; прыгожа аздобленыя саматканыя вырабы: ручнікі, посцілкі – і зразумелі, колькі сіл, намаганняў, натхнення і творчасці патрабавала праца над імі.
Экскурсавод падрабязна пазнаёміла нас са спосабамі прыгатавання абваранак, якімі славілася смаргонская зямля. Абваранкі ад слова абварыць.
А вось самай яркай падзеяй кірмашу стала сустрэча са скамарохам і мядзведзем. Скамарох цікава і падрабязна паведаміў наведвальнікам пра метады дрэсіроўкі мядзведзяў. Аказваецца, мядзведзіцы дрэсіроўцы не паддаюцца, а толькі мядзведзі, якім павінна быць да шасці месяцаў – не больш. Мішка паказаў, як вучні ідуць у школу і як радасна вяртаюцца з яе, як дзяўчаты прыхарошваюцца перад люстэркам…
Выстава “Смаргонь кірмашовая” закончылася частаваннем абваранкамі. Мы яшчэ раз дакрануліся да мінулага, бо, як запэўніў Уладзімір Караткевіч, “без мінулага –няма будучыні”.
Кожны чалавек павінен ганарыцца той мясцінай, дзе нарадзіўся і жыве, павінен любіць свой родны куточак, сваю малую радзіму, як часцінку нашай Бацькаўшчыны.
"Любіць сваю Радзіму - значыць ведаць яе", - сказаў В.Р.Бялінскі.
Людміла ПАШКЕВІЧ, настаўнік беларускай мовы і літаратуры сярэдняй школы № 7 г. Смаргоні.
Фота аўтара.